Aurreko urtean eta 30 urte pasa ondoren Sorotan Beleko taldekideak bueltan zirela iragarri zuten. Itzulerako lehen emanaldia gurekin batera egiteko asmoa zuten Larrabetzuko frontoian. Sarrerak salmentara atera ziren eta pandemiak bete betean harrapatu gintuen. Larrabetzuko emanaldiaz gain, ekainaren 30ean Getxon jotzekoak ginen ere.
Bi kontzertu hauek udazkenera pasatzeko saiakera egin genuen baina azaroan pandemiak berriro ere gogor egin eta ikuskizunak atzeratu behar izan genituen. Bitartean, ahal izan dugun moduan entseatzen ibili gara, talde txikietan eta osasun neurri guztiak betetzen.
Urtarrilean, osasun neurri zorrotzen artean, bandako entsegu orokorrak egiten hasi ginen eta iraila – abendua bitartean egindako lana bateratzeko momentua heldu zen. Apirilean entsegu orokorrekin aurrera egingo dugu, prestaketaren azken txanpan sartzen garelarik.
Osasun egoerak okerrera egiten ez badu, emanaldiak hurrengo data hauetan burutuko dira:
- Larrabetzun, maiatzaren 23an. SARRERAK LORTU
Lehendik erositako sarrerak baliogarriak dira maiatzaren 23rako.Gaur egungo arauak direla eta, edukiera murriztu behar izan dugu, eta bi emanaldi izango dira: lehenbizikoa 17:00etan hasiko da eta bigarrena 19:00etan. Adi! Sarrerak online erosita dituzuenak 17:00etako emanaldirako izango dira eta sarrera fisikoak erosi dituzuenak 19:00etako emanaldirako. Zalantzarik izanez gero, idatzi e-mail honetara (info@baga-biga.eus) eta sarrerak itzuli nahi dituzuenak, erosi duzuen leku berdinean itzuliko zaizue sarreraren dirua. Badira salgai oraindik sarrera gutxi batzuk: - 17:00etako emanaldirako. Sarrerak salgai: wegow - 19:00etako emanaldirako. Sarrerak salgai Larrabetzuko liburutegian.
- Getxon, maiatzaren 30ean, 18:00etan. SARRERAK LORTU
Gure bandaren laguntzarekin eta Xabier Zabalak egindako konponketa lanekin, “Atalaia”, “Arratsalde honetan” edo “Argiaren hiria” bezalako abestiak gogora ekarriko ditugu. Guretzako Xabier Zabalarekin berriro ere lanean aritzea pribilegio erraldoia da. Irribanda proiektuan ezagutu ginen eta orain Sorotan Bele bezalako talde ospetsu batekin aritzeko aukera eskaini zigun Xabik.
Emanaldia Ane Legarretak zuzenduko du. Ikasturtean zehar, taldekatzeetan bi zuzendari izan ditugu. Alde batetik Ane Legarreta izan dugu zura atala zuzentzen eta bestetik Asier Ituarte, bigarren zuzendaria, metalen eta perkusioen zaila zuzentzen.
Esan bezala, sarrerak dagoeneko salgai daude. Seguru gaude kontzertu berezi eta zirraragarria izango dela. Kontzertuaren berri gehiago jasotzeko, adi egon gure web gunera eta gure sare sozialetara, Facebook eta Instagram.